کوردی فەیلی بەشێکی جیانەکراوەی نەتەوەی کوردن و بە زاراوەکانی کوردی خواروو دەدوێن (( بە پێی پەڕتووکی دکتۆر ئیسماعیل قەمەندار ـ خوێندنەوەی زاراوە کوردیەکانی باشوور )) و هەزاران ساڵە لەو ناوچانەی کە تا ئێستا نێشتەجێین و ئەژین جێگیرین. لە هەردوو دیوی سنووری نێوان دەوڵەتی عێراق و ئێران، لە خانەقین لە باکوورەوە تا عەلیغەربی لە باشووری عێراق و لە ئیلام، کرمانشان و لوڕستان و شوێنی تر لە وڵاتی ئێران نیشتەجێن. کوردانی فەیلی بە ژمارەیەکی بەرچاوی زۆرەوە لە هەردوو شارە گەورەکانی وەک بەغدا و تاران ئەژین و نیشتەجێن. هیچ ئامارێک بۆ ژمارەی کوردە فەیلیەکان نەکراوە، بەڵام بە گشتی بۆ زیاتر لە ٣٠٠٠٠٠٠ سێ ملیۆن کس مەزەندە دەکرێن.
سەرنج بە نووسراوی کتێبە مێژووییەکان باس لەوە دەکرێ کە کورد بەشداریان لە دروستکردنی شاری بەغدادا کردووە لە ساڵی ٧٦٢ ی زایینی و لە سەردەمی خەلیفەی عەباسی (ابو جعفر المنصور) دا. کوردانی فەیلی بە سەرۆکایەتی ( ذولفقار موسلی) حوکمی عێراقیان لە کەرکوکەوە تا بەصرە کردووە لە نێوان ساڵانی ١٦٢٣ تا ١٦٢٩ی ز، بەڵام لە ئەنجامی رێکەوتنێکی نێوان هەردوو ئیمپراتۆری عوسمانی و سەفەویدا حوکمیان لە کوردەکان سەندۆتەوە و زاڵ بوون بە سەریاندا.
لێرەدا ئیشارەت بە کێشەو دۆزی کوردە فەیلیەکان دەدەین لە عێراق دا. لەسەرەتادا ئەو کێشەیە بە دامەزراندنی دەوڵەتی عێراق دوای جەنگی جیهانی یەکەمەوە، بە پێی رێکەوتنی سایکس پیکۆوە دەستی پێکرد، لە یەکەمین بڕیاری یاساییدا بۆ هاوڵاتیانی عێراقی (( یاسای ژمارە ٤٢ ی ساڵی ١٩٢٤ )) بەوەی کە عێراقیەکانی سەر بە تەبەعیەی عوسمانی »هاوڵاتی پلە یەک » و تەبەعیەی ئێرانی » بە هاوڵاتیانی پلە دوو و سێ » سەپاند و دەسڵاتدارانی ئەوکاتی عێراق کوردی فەیلیی خستە خانەی تەبەعیەی ئێرانیەوە ـ سەر بە ئێرانەوە.
سەرەڕای ئەوەی کە کوردی فەیلی پلە دووی هاوڵاتیانی عێراقی دەژمێردران، بەڵام لە دامەزراندنی ئابووری دەوڵەتی عێراقەوە لە رووی خاوەندارێتی تایبەتدا بەشداریان کرد. بۆیە دەڵێین لە رێگای خاوەندارێتی تایبەت، چونکە دەرگای دامەزراندن لە کەرتی گشتیدا بە سەریاندا داخراوو رەوا نەبوو. لە رووی سیاسیشەوە بەشداریەکی چالاکانەی جموجۆڵی بزووتنەوەی دیموکراسی عێراقی و کوردستانی بوون. جێشوێن دیارو بەشداری کارایانەیان لە بواری ئەدەب و رۆشنبیری دا، هەر لە شاعیر، نووسەر و زمانزانەوە تا لە بواری هونەر وەک گۆرانیبێژ، موسیکسیۆن و بواری نواندن و شانۆ و وەرزش و تێکڕای بوارەکانی ژیانی مەدەنیانە لە عێراقدا هەبووەو بەشداریان کردووە.
کوردانی فەیلی لە ساڵانی پەنجاکانی سەدەی رابردوودا توانیان دەست بەسەر کەرتی تایبەتی بازرگانی لە بەغدای پایتەخت بگرن و لەو رووەوە لە جموجۆڵ و کاری بازرگانیدا سەرکەوتوو بوون. بەشداری کوردی فەیلی لە ژیانی سیاسی عێراق و لە نێو ریزەکانی هێزە دیموکراسی و پێشکەوتوخوازەکانی عێراقی دا بەرچاو و ئاکتیڤانە بوو. تا ئەو ئاستەی گەیشتنیان بە پۆستی بەرپرسایەتی باڵا لە ریزەکانی ئەو بزووتنەوانە وەرگرن. لە هەمان کاتدا بەشداریکردنی کوردی فەیلی لە بزووتنەوەی رزگاریخوازی گەلی کورد دا لە سەرەتای دامەزراندنیەوە و لە هەمان کاتدا بەشێک بوون لە دامەزرێنەرانی پارتی دیموکراتی کوردستان لە ساڵی ١٩٤٦ لە شاری بەغدا. بۆ نموونە: تا پێش ئازاری ساڵی١٩٧٥ سەرۆکەکانی یەکیەتی ئافرەتان، یەکیەتی قوتابیان، یەکیەتی لاوان و سکرتێری خودی حیزبی پارتی دیموکراتی کوردستان خۆیشی لە کوردی فەیلی بوون.
فەیلیەکان بە گشتی بە دەستئاواڵەیی پشتگیری ئابوری، سیاسی، لۆجستیکی و خزمەتکردنی سەربازیی عێراقیان کرد و هەروەها بەشداری کارایان لە بزووتنەوەی رزگاری کوردو کوردستان دا کرد لە رووی سیاسی و بەشداری چەکداری لە ریزەکانی پێشمەرگە دا. هەروەها لە بەشداری دەزگاکانی راگەیاندن و خزمەتی ئەکادیمی، پزیشکیی و تەندروستی و ئەندازیاری بیناسازی …هتد یان کردوە لەو وڵاتەدا.
لە دوای ساڵی ١٩٧٥ ـەوە کوردانی فەیلی لە دامەزراندنی یەکیەتی نیشتیمانی کوردستان و پارتی گەلی دیموکراتی کوردستان لە ساڵی ١٩٨١ دا بەشدار بوون. بە هۆی رۆلی دیار و بەرچاوی کوردی فەیلی لە ژیانی ئابوری دا ( بازرگانی کەرتی تایبەت ) و کایەی سیاسی لەنێو ریزەکانی بەرهەڵستکاریی عیراقی و کوردستانیدا لە بەرامبەر سەرنەکەوتنی بەعس لە بەدەستهێنانی پشتگیری فەیلیەکان بۆ بەرژەوەندی دەسەڵاتی بەعسییەکان. بۆیە فەیلیەکان بوونە ئامانجی زەبر و لێدانی سەرەکی لەلایەن سیستەمی دەسەڵاتی بەعس لە عێراقدا. هەر بۆیە دەوڵەت دەستی کرد بە زۆرەملێ راگواستنی ٥٠٠٠٠ پەنجا هەزار رۆڵەی کوردی فەیلی لە نێوان ساڵانی ١٩٦٩ ـ ١٩٧٢ بۆ وڵاتی ئێران.
ئەنجومەنی سەرکردایەتی شۆڕش کە گەورەترین دەسەڵاتی ئەو سەردەمەی عێراق بوو ، بڕیارێکی دەرکرد بە ژمارەی ٦٦٦ ـی رێکەوتی ٧ـی ئایاری ١٩٨٠ و لە رۆژنامەی روداوەکانی عێراق ( الوقائع العراقیە ) ی ژمارە ٢٧٧٦ ی رۆژی ٢٦ـی ئایاری١٩٨٠ دا بڵاوکرایەوە.
کورتەی بڕیارەکە
هەر هاوڵاتیەکی عێراقی بە رەسەن بێگانە بێت، رەگەزنامەی عێراقی لێدەسەنرێتەوە.
لەسەر وەزیری ناوەخۆ کە فەرمان بدات ئەوانەی رەگەزنامەی عێراقیان لێدەسەندێتەوە بەپێی فەقەرەی ١ دوور بخرێنەوە… هتد
هێرشی بە زۆرەملێ گواستنەوەی کوردانی فەیلی لە ٤ ی نیسانی ١٩٨٠ دا، سەرەتا لە بازرگانە گەورەکانەوە دەستیپێکرد و تا ساڵی ١٩٩٠ بەردەوامی کرد. دوای ئەوەی کە رەگەزنامەی عێراقیان لێسەندرایەوە دەستیان بە سەر هەرچی ماڵ و موڵکی راگوێزراو رانەگوێزراوەکانیشدا گرت و گشت سەنەد و دەکۆمینت و بەڵگەنامە فەرمی و نافەرمیەکانیشیان لێ فڕاندن و بە هەزارەها کوردی فەیلییان لە تەمەنی نێوان ١١ تا ٣٠ ساڵیەوە دەستەسەرکرد و بێ سەروشوێنیان کردن، کە ژمارەیان لە ٢٠٠٠٠ بیست هەزار کەس زیاتربوو. بە پێی وتەی سەرۆک وەزیرانی پێشووی عێراقی فیدڕاڵ نوری المالکی لە میانەی کۆنگرەیەکی کوردە فەیلیەکان دا کە لە بەغدا ئەنجام درا پێشکەشی کرد.
بەپێێ تەئکیدکردنی داواکاری گشتی لە کەیسی بەزۆرڕاگواستن و کوشتنی کوردە فەیلیەکان، عبدالقادر الحمدانی و بڵاوبوونەوەی زانیاریەکان لە رۆژنامەی شەفەق نیوزدا لە رێکەوتی ٤ ـ ٨ / ٢٠١٢ بە گوێرەی ئەو بڕیارە ٦٠٠٠٠٠ شەشسەدهەزار لە کوردی فەیلی لە هەموو لایەکی عێراقەوە راکێشرانە سەنتەرەکانی کۆکردنەوە و یەکسەر رەوانەو راگوێزرانە سەر سنوورەکانی ئێران.
خەڵکانی کوردی فەیلی ئەوانەی کە راگوێزران، هەموویان لەسەر کار، جێگای کار، قوتانخانەو خانەسەربازیەکانیان لابران. لێرەدا ئەمانەوێ ئیشارەت بەوە بدەین کە ئەوەی بە گوێرەی بنەماکانی بنکەی سەرژمێژی، کۆی ژمارەی کوردی فەیلی بەزۆرڕاگوێزراو ١٦٠٠٠٠٠ ملیۆنێک و شەشسەدهەزار کەس دەبێت. لەسەر ئەساسی ئەوەی رێژەی زیاد بوونی نفوس ـ باری کەسێتی لە عێراقدا لە ٢،٨ ٪ ە.
دوای رووخانی رژێمی بەعس لە عێراق لە ساڵی ٢٠٠٣، کوردانی فەیلی تەنها ژمارەیەکی کەم نەبێت، نەیانتوانی بگەڕێنەوە بۆ سەر ماڵ و مولک و ناوچەکانیان، بۆ ئەوەی ماف و بەڵگەنامەو ماڵ و موڵکیان بۆ بگەڕێتەوە. تا ئێستایش حکومەتی فیدڕاڵی عێراق هیچ زانیاری و روونکردنەوەیەکی لە بارەی چارەنووسی ونبوو و دەستبەسەرەکانی پێشکەش نەکردووە کە بە چ شێوەیەک رژێمی بەعس لەناوی بردوون و ئێسک و پروسکیان کەوتۆتە کوێ.
بە داخەوە دوای ساڵی ٢٠١٣ کوردی فەیلی رووبەڕووی کارەساتی نامرۆڤانەی تازە بوونەوە، ئەمجارەیان لەسەر دەستی چەتەکانی بەعس و سەلەفی و بەکرێگیراوانی تر و دواتر بەدەستی چەتەکانی داعشەوە بەتایبەت لە دیالا ( خانەقین، مەندەلی، شارەبان، سەعدیە و جەلەولا ) و بەغدا و مەدائن ( سەلمان پاک ) و چەند شوێنێکی تر.
کوردی فەیلی لە عێراقدا داوای چارەسەریەکی ریشەیی کێشەکانیان دەکەن و داوا وگەیشتن بە مافە رەواکانیان پێویستی بە جێبەجێکردنە. لە دوای رووخانی بەعس تا ئێستا چاوەڕوانیی درێژەی کێشا و ئەو رەوشەی ئێستای گشتی لە عێراق دا هەیە تروسکەی رووناکی بۆ وەرگرتنی مافەکانی کوردی فەیلی بەدی ناکرێت و بێ هیوان لێی، مەگەر بزووتنەوەیەکی جیدی و دڵسۆزانە بۆ کەیسەکە کار بکات.
داخوازە سەرەکیەکانی کوردی فەیلی لە ئەنجامنامەی یەکەم کۆنفڕانسی جیهانی کوردی فەیلی کە لە بڕۆکسلی پایتەختی بەلجیکا لە ٢ ی ئایاری ٢٠١٦ دا بەسترا راگەیێندرا. چەندێک لەو داواکاریانە پەیوەستن بە ئەو بەسەرهاتانەی کە لە رابردوودا بەسەر کوردی فەیلی دا هاتووە و لە بەندەکانی ١ ـ ٨ لە داواکاریەکان پێویستی بە وڵامدانەوەی حکومەتی عێراقی و سازیە نێونەتەوەییەکانەوە هەیە، بە تایبەت کە دادگای باڵای تاوانەکانی عێراق لە رێکەوتی ٢٩ ـ ١١ ـ ٢٠١١ ەدا بڕیارێکی دەرکرد کە بەسەرهاتی کوردانی فەیلی و بە کۆمەڵکوژی ـ جینۆساید ئەژماری کرد، هەروەها پەڕلەمانی عێراقیش بڕیارێکی لە ٨ـ١ـ٢٠١١ دا دەرکرد ئەو تاوانانەی کە بەسەر کوردە فەیلیەکان هێنرا بە تاوانی کۆمەڵکوژی ئەژمار دەکات. هەمدیس ئەنجوومەنی وەزیرانی عێراقی بە بڕیاری ژمارە ٤٢٦ ـی ٩ـ١٢ـ٢٠١٠ هەموو ئاسەوارێکی نەگەتیڤی لەسەر کوردی فەیلی لابرد. لێرەدا داواکاریش هەیە کە بەستراوە بە داهاتووی کوردی فەیلیەوە لە عێراقدا. خاڵی ٩، ١١ و ١٣ و ١٤ بە تایبەت خاڵی ٩ کە زۆر گرنگە و لەوانەیە ببێتە مەسەلەیەکی چارەنووسساز بۆ داهاتوویێکی دوور.
لێرەدا پێداگریێکی زۆر جیدی پێویستە بۆ وەرگێڕانی ئەم داوایانە بۆ هەنگاوی کردەگی ـ پڕاکتیک و بەرەو جێبەجێکردن و بەردەوامی بەدواداچوون بە هەوڵ و تێکۆشانی کوردانی فەیلی خۆیان و بە پشتگیری خوشک و برا کورد و کوردستانیەکان لە هەموو بەشەکانی کوردستان، بەتایبەتی لە باشوور و عێراق و هەروەها پشتگیری لەلایەن خوشک و برا عێراقیەکان کە لە سەر کەیسی کوردی فەیلی تێگەیشتوون و پشتگیری داواکانیان دەکەن.
زۆرینەی کوردانی فەیلی خۆشحاڵ و خۆش موژدەبوون بە گرتنی کۆنفڕانسی یەکەمی نێونەتەوەیی لەسەر کوردی فەیلی لە برۆکسل ئەوەی لە رۆژی ٢ ی ئایاری ٢٠١٦ بەڕێوە چوو و بە دڵخۆشیەوە پشتگیریان لە ئەنجامنامەکە کرد و ئومێد و چاوەڕوانیەکی گەورەیان هەیە و داوای جێبەجێکردن و بەدواداچوونی داواکاریەکان دەکەن. ئەمانەوێ پشتڕاستی کەینەوە کە هەر پێشکەوتنێک لە سەر ئاستی نێونەتەوەیی بەسەر کەیسی فەیلیەکان دا بێت کاریگەری راستەوخۆ و ئەرێنی ئەبێت لەسەر باری دەروونی و ژیانی کوردی فەیلی لە عێراق و پەناهەندەو راگوێزەکانی ئێران و هەموو ئەوانەیش کە لەوڵاتانی جیهاندا ژیان بەسەردەبەن.
لە خاڵی دوازدەهەمینی ئەنجامنامەی کۆنفرانسدا هاتووە کە بەردەوامی لە کارو هاوکاری لەسەر ئاستێکی بەرفراوانتر لەگەڵ کۆنگرەی نەتەوەیی کوردستان ـ ک ن ک دا، سەمینار و کۆنفڕانس لە وڵاتانی ئەوڕوپا لەسەر کۆمەڵکوژی کوردانی فەیلی لەسەر ئاستی نێودەوڵەتی ببێتە بەشێک لە بەرنامەی ساڵانەی کارو خەباتی کۆنگرەی نەتەوەیی کوردستان.
لەبەر ئەوە چاوەڕوانی بەردەوامی و پشتگیری و رێکخستنین لەگەڵ کۆنگرەی نەتەوەیی کوردستان دا بۆ بەجێهێنانی خاڵەکانی ئەنجامنامەو ئامانجی کۆنفڕانسەکە.
دەقی راسپاردەکانی یەکەم کۆنفڕانسی نێونەتەوەیی کوردە فەیلییەکان:ـ
١. کۆنفڕانس داوا لە پەڕلەمانی یەکیەتی ئەوڕوپا دەکات، هەموو ئەو تاوانانەی دژ بە کوردانی فەیلی لە سەردەمی رژێمی بەعس دا کراون بە تاوانی کۆمەڵکوژی ( جینۆساید ) بژمێردرێن، هاوشێوەی ئەو بڕیارەش بۆ سەر ئێزیدی و کریستیانەکان و شەبەکدا هاتووە بە هەمان شێوە تاوانی جینۆسایدە. بە تایبەتی کە عێراق لە ساڵی ١٩٥٩ دا پەیمانەکەی جنێڤی ساڵی ١٩٤٩ ی واژوو کرد کە تایبەتە بە قەدەغەکردنی ئەنجامدانی تاوانی جینۆساید ـ کۆمەڵکوژی. هەروەها دەرچوونی حوکمی دادگای باڵای تاوانی عێراق و بڕیاری ئەنجوومەنی نوێنەرانی عێراق سەبارەت بەوەی کە راگواستن و کوشتنی کوردانی فەیلی یەکێکە لە تاوانەکانی کۆمەڵکوژی ـ جینۆساید.
٢. وەگەڕخستنی گشت یاسا و بڕیارە پەیوەندیدارەکان بە کوردانی فەیلی کە لە ساڵی ٢٠٠٣ وە دەرچوون و جێبەجێکردنیان بە بێ بەبیرۆکراتیکردن و خۆدزینەوە و دواخستن بە پاساوی جیاوازەوە. ئەو یاسا و بڕیارانەی کە پەیوەندیان بە پرسگەلی ناسنامە، بەڵگەکانی خۆسەلماندن و ماڵ و موڵکی دەسبەسەرداگیراودا و شتی ترەوە هەیە.
٣. جێکردنەوەی کوردانی فەیلی لەناوەندەکانی بڕیار لە هەردوو دەسەڵاتی یاسادانان و راپەڕاندن ( جێبەجێکردن ) دا لە بەغدا و هەولێر.
٤. داوا لە دەسەڵاتدارانی هەرێمی کوردستان ـ باشوور بکرێ کە ناوی کوردانی فەیلی هاوشێوەی ئێزیدی و شەبەک و کاکەییەکان لە دەستووری هەرێمی کوردستان دا ریز بکرێ و بگونجێندرێ و کورسی کۆتایان بۆ مسۆگەر بکرێ لە پەڕلەمانی کوردستاندا.
٥. دانپێنان بە کوردی فەیلی وەکو یەکێک لە پێکهاتەکانی گەلی عێراق، کە خاوەن تایبەتمەندیەکانی خۆیانن.
٦. هاندانی دەسەڵاتدارانی عێراقی و ئەمریکایی ( کە بە تۆن بەڵگەنامەکانی رژێمی پێشوویان لە دوای ساڵی ٢٠٠٣ ەوە بۆ ئەمریکا راگوێستەوە ) بۆ ئەوەی بەڵگەکانی تایبەت بە چارەنووسی رۆلەکانی کوردی فەیلی دیار و ئاشکرا بکرێ کە لەلایەن رژێمی بەعسەوە دەستبەسەرکرابوون و بێ سەروشوێن کران.
٧. کۆتایی هێنان بە هەموو شێوەکانی جیاکاری کە لە لایەن دامودەزگاکانی دەوڵەتەوە دژ بە کوردانی فەیلی بەکاردەهێنرێن و دەرفەتی یەکسانیان بۆ بسازێ لەسەر بنەمای هاوڵاتیبوون نەک لەسەر بنەمای دیکە بونیاد نرابێ.
٨. گەڕانەوەی سەرجەم کۆچپێکراو و راگوێزراوانی کوردی فەیلی بۆ جێگا و شوێنی رەسەن و زێدی خۆیان و ئاوەدانکردنەوەی ناوچەکانیان ئەو ناوچانەی کە بە دەستی رژێمی بەعس لە دوێنی و چەتە و تیرۆرستەکانی ئەمڕۆ خاپوور کران و کراون. نموونەی خانەقین، سەعدیە، جەلەولا، مەندەلی، بەدرەو جەسان و چەند ناوچەیەک لە هەردوو پارێزگاکانی واسط و میسان و هەروەها بەغدایش.
٩. دەستنیشانکردنی هەرێمەکانی کوردانی فەیلی لە پارێزگاکانی دیالا، واسط و میسان و رێکخستنەوەیان لە چوارچێوەی هەرێمێکی کوردانی فەیلی دا کە خۆیان وەک خودموختاری ئەو هەرێمە بەڕێوە ببەن.
١٠. داوا لە دەسەڵاتدارانی عێراق و دەوڵەتی ئێران بکرێ، کە زانیاری سەبارەت بە ژمارەی کوردانی فەیلی لەو شوێنانەی کە لێی دەژین، لە هەر یەک لە و دوو وڵاتانەدا و ئاشکرایکەن و بیخەنەڕوو.
١١. پاراستن و چاودێریکردنی زمان و کەلتووری کوردانی فەیلی و کەلەپوورەکەیان و دابینکردنی پرۆسەی فێرکردن و پەروەردە بە زمان دایک.
١٢. هاوکاری و هەماهەنگی بەردەوام و بەبەرفراوانتر لەگەڵ کۆنگرەی نەتەوەیی کوردستان ـ ک ن ک دا و پەرەی پێبدرێت. لە رێکخستن و پێشکەشکردنی سەمینار و کۆبوونەوە و دیدار لە وڵاتانی ئەوڕۆپا دا. بۆ ئەوەی جینۆسایدی کوردانی فەیلی لەسەر ئاستی دونیادا باشتر بناسرێندرێ.
١٣. ئامادەکردن و رێکخستنی کۆڕو سەمینار و کۆڕبەند لە زانکۆو ئەنستیتوە نێودەوڵەتیەکان دەربارەی پرسگەلی کوردانی فەیلی بە مەبەستی راکێشانی سەرنجی لێکۆڵەر و رووناکبیرە ئەوڕۆپیەکان بۆ ئەوەی لێکۆڵینەوە و توێژینەوە لەسەر پرسەکان بکەن.
١٤. رێکخستنی هەڵمەتی جۆراوجۆر لە بوارەکانی راگەیاند و روناکبیری و خۆناساندن لە نێو هەموو پێکهاتەکانی کوردستان بۆ ئەوەی زانیاری پەیوەندیدار بە ئۆپەراسیۆنەکانی پاکتاوی رەگەزی و جینۆسایدی کوردانی فەیلی بگەیەنرێنە رای گشتی کوردی لە هەموو بەشەکانی کوردستان.
کۆنفڕانس سوپاسی گرووپی ئیتیلافی پێشکەوتنخوازی سۆسیالیست و دیمۆکراتەکان لە پەرلەمانی ئەوروپا دەکات بۆ ئاسانکاری و دانی ئەو کۆمەکە ماددی و لۆجیستیەی کە بۆ بەستن و سەرخستنی یەکەمین کۆنفڕانسی نیونەتەوەیی کوردانی فەیلی پێشکەش کرد. هەروەها سوپاسی کۆنگرەی نەتەوەیی کوردستان ـ ک ن ک ەیش دەکات بۆ ئەو ڕەنجەی کە دایان و پێشکەشیان کرد لە پێناو بەستن و ڕێکخستنی کۆنفڕانسەکە. هاوکات کۆنفڕانس سوپاسی خۆی پێشکەش بە هەموو میوانەکان دەکات کە زەحمەتیان کێشا بۆ بەشداریکردن لە کۆنفڕانسەکەدا و سوپاسی دەزگاکانی ڕاگەیاندن دەکا کە ڕووماڵی هەواڵ و چالاکییەکانی کۆنفڕانسەکەیان کردووە و لە سەرەتاوە تا کۆتایی لەوێ ئامادەبوون.
ئەو وتارە لە لایەن گروپیک لە کوردانی فەیلی لە شانزدەمین جواتی گشتی کۆنگرەی نەتەوەیی کوردستان، کنک لە ١و٢ ئۆکتۆبری ٢٠١٦ لە برۆکسێل پێشکەش کراوە.
