کاتی دروستکردنی سپایەکی هاوبەشی کوردستانییە
نیشتیمانی ئێمە کوردستان تەنیا شوێنێکی گۆی زەمینە کە لە چوار لاوە کەوتووبێتە ناو ئاگربارانێکی داگیرکەرییەوە. تەنیا شوێنێکە کە بە دەیان گرووپی چەتە و تیرۆریستیی غەیرەزنیزامیان لە ژێر ناوی جودا دژ بە خەباتە ئازادیخوازییەکەی دروست کردبێت. تەنیا نیشتیمانێکی داگیرکراویشە کە بەو شێوەیە لە ئاستێکی باوەڕپێنەکراودا رووبەڕووی کۆنەپەرستیەکی مەزهەبیی و دڕندەییەکی داگیرکەرانە بوو بێتەوە.
خەبات و تێکۆشانی ئێمەی کوردستانیی دژ بە دەوڵەتانی ئێراق و ئێران و سووریا و تورکیا مایەی شانازایی و سەربەرزیمانە، بەڵام ئیدی لە سەر هەموو ئازادیخواز و تێکۆشەرێکی کوردستانیی پێویستە کە زۆر کەمتر حیزبیی و ناوچەگەر و کاتیی بیر بکەنەوە. بیرکردنەوەمان دەبێت کوردستانیی سەرانسەریی و ستراتیژیی دواڕۆژانە بێت.
هێرشی داگیرکەران بۆ سەر گەلەکەمان هیچ سنوورێکی دەراوسێیەتی، مێژوویی، رەووشتیی، دیپلۆماسیی و سیاسیی ناناسێت. ئامانجی ئەوان سڕینەوەی ناوی کورد و کوردستانە لە مێژوودا.
لەبەرئەوە ئێمەی کوردستانیی دەبێت یەکدەنگ و یەکسەنگەر بەرامبەر بە داگیرکەران ڕابووەستین.
بۆ ئەوەی بتوانین دەستکەوتەکان لە باشوور و ڕۆژئاوای کوردستان بپارێزین و هەروەها بەر بە هێرشی دڕندانەی داگیرکەران بۆ سەر باکوور و ڕۆژهەڵات بگرین پێویستە زووبەزوو سپایەکی هاوبەش دابمەزرێنین، سپایەکی کوردستانیی کە تەواوی سنوورە حیزبیی و ناوچەیی و پارچەییەکان بشکێنێت.
لە ڕاستییدا داگیرکەران چوار نیین، یەک دانەن. ئەوان کاتێک هێرش دەهێننە سەر کوردستان و هەڕەشە لە گەلی کورد دەکەن و دەیانەوێت بیترسێنن و ناچار بە تەسلیمبوونی بکەن، بیر لە ئەم پارچە و ئەو پارچە ناکەنەوە. بۆ ئەوان بەهدینان و سۆران و گەرمیان و بۆتان و شکاک و هەورامان و یارسان و ئێزیدیی و عەلەویی و سۆسیالیست و لیبرال و هتاد نییە. ئەوان دژی گەلی کوردستانن و دەیانەوێت خاکی کوردستان بە داگیرکراویی لە دەست خۆیاندا بهێڵنەوە.
وەڵامی دروستی کوردستانیانیش دەبێت لەو چوارچێوەیەدا بێت: داگیرکەر بۆ دەرەوە لە خاکی کوردستان!
هەوڵی کوردستانیان بۆ دامەزراندنی سیستەمێکی دیموکراتیکی سیکولار و پلورالیستی پێشکەوتوو داگیرکەران و کۆنەپەرستانی ناوچەکەی تەواو هەژاندووە. ئەوان لە مێژە بڕیاریان داوە کە دژ بە سەربەخۆیی و مافی خەڵکی کوردستان بن بۆ مافی بڕیاردان لەسەر جارەنووسی خۆیان. ئێمەی کوردستانییش دەبێت لەو ئاستەدا وەڵامیان پێ بدەینەوە. ئەویش یەکخستنی هێزی بەرگریی کوردستانە، دروستکردنی سپایەکی یەکگرتووە، دانانی فەرماندەیەکی پاراستنی هاوبەشە، و سوود وەرگرتنە لە توانا و لە هێزی گەلەکەمان کە لە هەموو کاتێکدا سەدان هەزار لە جەوانان ئامادەن خۆبەخشانە سەنگەرەکان بپارێزن، کچان و ژنانی کورد سەری بڵند و پایەی خۆڕاگریی ئەو تێکۆشانەن.
کۆنگرەی نەتەوەیی کوردستان داوا لە هەموو تاکێکی کورد دەکات لەو هەستەبەرپرسیارییەوە بەرخورد بکات، کە لە ناو خۆدا ئارام و هێمن بن و دیالۆگێکی نیشتیمانیی و زمانێکی سیاسیی جیددیی پاراو پێش بخەن، و ڕێگا بە خۆیان نەدەن کات و وزەی نیشتیمانیمان لە قۆچ لەیەکهەڵسووینی ناوخۆدا بە فیڕۆ بڕووات. دەبێت ڕێز لە هەموو تێکۆشەر و لە هەموو شێوەیەکی تێکۆشان بگرین. کوردستان نیشتیمانی هەموومانە!
لەو بارەوە داوا لە هەمووان دەکەین داوای دامەزراندنی سپا و فەرماندەیەکی پاراستنی هاوبەش بکەن و بیخەنە ڕۆژەڤی خۆیانەوە. تەمەنی داگیرکەریی لە کوردستان بەرەو کورتبوونەوە دەچێت، بە سپایەکی یەکگرتوو زووتر چۆک بە داگیرکەر دەدەین و دەیبەزێنین. جیهانیش ئەو ڕێزەمان نیشان دەدات کە گەلەکەمان شایستەیەتی.
کۆنسەی بەڕێوەبەرایەتیی کۆنگرەی نەتەوەیی کوردستان
23/9/2017
